Martialis, 9, XI.
| 1 | Nomen cum violis rosisque natum, |
| 2 | Quo pars optima nominatur anni, |
| 3 | Hyblam quod sapit Atticosque flores, |
| 4 | Quod nidos olet alitis superbae; |
| 5 | Nomen nectare dulcius beato, |
| 6 | Quo mallet Cybeles puer vocari |
| 7 | Et qui pocula temperat Tonanti, |
| 8 | Quod si Parrhasia sones in aula, |
| 9 | Respondent Veneres Cupidinesque; |
| 10 | Nomen nobile, molle, delicatum |
| 11 | Versu dicere non rudi volebam: |
| 12 | Sed tu syllaba contumax rebellas. |
| 13 | Dicunt Eiarinon tamen poetae, |
| 14 | Sed Graeci, quibus est nihil negatum |
| 15 | Et quos Ἆρεσ Ἆρες decet sonare: |
| 16 | Nobis non licet esse tam disertis, |
| 17 | Qui Musas colimus severiores. |