| 1 | Qui nunc Caesareae lusus spectatur harenae, |
| 2 | Temporibus Bruti gloria summa fuit. |
| 3 | Aspicis, ut teneat flammas poenaque fruatur |
| 4 | Fortis et attonito regnet in igne manus! |
| 5 | Ipse sui spectator adest et nobile dextrae |
| 6 | Funus amat: totis pascitur illa sacris; |
| 7 | Quod nisi rapta foret nolenti poena, parabat |
| 8 | Saevior in lassos ire sinistra focos. |
| 9 | Scire piget post tale decus, quid fecerit ante: |
| 10 | Quam vidi, satis hanc est mihi nosse manum. |