| 1 | Nosti si bene Caesium, libelle, |
| 2 | Montanae decus Umbriae Sabinum, |
| 3 | Auli municipem mei Pudentis, |
| 4 | Illi tu dabis haec vel occupato: |
| 5 | Instent mille licet premantque curae, |
| 6 | Nostris carminibus tamen vacabit: |
| 7 | Nam me diligit ille proximumque |
| 8 | Turni nobilibus legit libellis. |
| 9 | O quantum tibi nominis paratur! |
| 10 | O quae gloria! quam frequens amator! |
| 11 | Te convivia, te forum sonabit, |
| 12 | Aedes, compita, porticus, tabernae. |
| 13 | Uni mitteris, omnibus legeris. |