| 1 | Sic Tiburtinae crescat tibi silva Dianae |
| 2 | Et properet caesum saepe redire nemus, |
| 3 | Nec Tartesiacis Pallas tua, Fusce, trapetis |
| 4 | Cedat et inmodici dent bona musta lacus; |
| 5 | Sic fora mirentur, sic te palatia laudent, |
| 6 | Excolat et geminas plurima palma fores: |
| 7 | Otia dum medius praestat tibi parva December, |
| 8 | Exige, sed certa, quos legis, aure iocos. |
| 9 | 'Scire libet verum? res est haec ardua.' Sed tu |
| 10 | Quod tibi vis dici, dicere, Fusce, potes. |