| 1 | Cum sis tam pauper, quam nec miserabilis Iros, |
| 2 | Tam iuvenis, quam nec Parthenopaeus erat, |
| 3 | Tam fortis, quam nec, cum vinceret, Artemidorus, |
| 4 | Quid te Cappadocum sex onus esse iuvat? |
| 5 | Rideris multoque magis traduceris, Afer, |
| 6 | Quam nudus medio si spatiere foro. |
| 7 | Non aliter monstratur Atlans cum compare ginno |
| 8 | Quaeque vehit similem belva nigra Libyn. |
| 9 | Invidiosa tibi quam sit lectica, requiris? |
| 10 | Non debes ferri mortuus hexaphoro. |