| 1 | Non totam mihi, si vacabis, horam, |
| 2 | Dones et licet inputes, Severe, |
| 3 | Dum nostras legis exigisque nugas. |
| 4 | 'Durum est perdere ferias': rogamus, |
| 5 | Iacturam patiaris hanc ferasque. |
| 6 | Quod si legeris ista cum diserto |
| 7 | - Sed numquid sumus inprobi? - Secundo, |
| 8 | Plus multo tibi debiturus hic est, |
| 9 | Quam debet domino suo, libellus. |
| 10 | Nam securus erit, nec inquieta |
| 11 | Lassi marmora Sisyphi videbit, |
| 12 | Quem censoria cum meo Severo |
| 13 | Docti lima momorderit Secundi. |