Martialis, 5, LXV.
| 1 | Astra polumque dedit, quamvis obstante noverca, |
| 2 | Alcidae Nemees terror et Arcas aper |
| 3 | Et castigatum Libycae ceroma palaestrae |
| 4 | Et gravis in Siculo pulvere fusus Eryx, |
| 5 | Silvarumque tremor, tacita qui fraude solebat |
| 6 | Ducere non rectas Cacus in antra boves. |
| 7 | Ista tuae, Caesar, quota pars spectatur harenae? |
| 8 | Dat maiora novus proelia mane dies. |
| 9 | Quot graviora cadunt Nemeaeo pondera monstro! |
| 10 | Quot tua Maenalios conlocat hasta sues! |
| 11 | Reddatur si pugna triplex pastoris Hiberi, |
| 12 | Est tibi qui possit vincere Geryonen. |
| 13 | Saepe licet Graiae numeretur belva Lernae, |
| 14 | Inproba Niliacis quid facit Hydra feris? |
| 15 | Pro meritis caelum tantis, Auguste, dederunt |
| 16 | Alcidae cito di, sed tibi sero dabunt. |