| 1 | Sum, fateor, semperque fui, Callistrate, pauper, |
| 2 | Sed non obscurus nec male notus eques, |
| 3 | Sed toto legor orbe frequens et dicitur 'Hic est', |
| 4 | Quodque cinis paucis, hoc mihi vita dedit. |
| 5 | At tua centenis incumbunt tecta columnis |
| 6 | Et libertinas arca flagellat opes, |
| 7 | Magnaque Niliacae servit tibi glaeba Syenes, |
| 8 | Tondet et innumeros Gallica Parma greges. |
| 9 | Hoc ego tuque sumus: sed quod sum, non potes esse: |
| 10 | Tu quod es, e populo quilibet esse potest. |