| 1 | Condita cum tibi sit iam sexagensima messis |
| 2 | Et facies multo splendeat alba pilo, |
| 3 | Discurris tota vagus urbe, nec ulla cathedra est, |
| 4 | Cui non mane feras inrequietus Have; |
| 5 | Et sine te nulli fas est prodire tribuno, |
| 6 | Nec caret officio consul uterque tuo; |
| 7 | Et sacro decies repetis Palatia clivo |
| 8 | Sigerosque meros Partheniosque sonas. |
| 9 | Haec faciant sane iuvenes: deformius, Afer, |
| 10 | Omnino nihil est ardalione sene. |