| 1 | Dum nos blanda tenent lascivi stagna Lucrini |
| 2 | Et quae pumiceis fontibus antra calent, |
| 3 | Tu colis Argei regnum, Faustine, coloni, |
| 4 | Quo te bis decimus ducit ab urbe lapis. |
| 5 | Horrida sed fervent Nemeaei pectora monstri, |
| 6 | Nec satis est, Baias igne calere suo. |
| 7 | Ergo sacri fontes et litora grata valete, |
| 8 | Nympharum pariter Nereïdumque domus. |
| 9 | Herculeos colles gelida vos vincite bruma, |
| 10 | Nunc Tiburtinis cedite frigoribus. |