Martialis, 4, XLVI.
| 1 | Saturnalia divitem Sabellum |
| 2 | Fecerunt: merito tumet Sabellus, |
| 3 | Nec quemquam putat esse praedicatque |
| 4 | Inter causidicos beatiorem. |
| 5 | Hos fastus animosque dat Sabello |
| 6 | Farris semodius fabaeque fresae, |
| 7 | Et turis piperisque tres selibrae, |
| 8 | Et Lucanica ventre cum Falisco, |
| 9 | Et nigri Syra defruti lagona, |
| 10 | Et ficus Libyca gelata testa |
| 11 | Cum bulbis cocleisque caseoque. |
| 12 | Piceno quoque venit a cliente |
| 13 | Parcae cistula non capax olivae, |
| 14 | Et crasso figuli polita caelo |
| 15 | Septenaria synthesis Sagunti, |
| 16 | Hispanae luteum rotae toreuma, |
| 17 | Et lato variata mappa clavo. |
| 18 | Saturnalia fructuosiora |
| 19 | Annis non habuit decem Sabellus. |