| 1 | Obstat, care Pudens, nostris sua turba libellis |
| 2 | Lectoremque frequens lassat et implet opus. |
| 3 | Rara iuvant: primis sic maior gratia pomis, |
| 4 | Hibernae pretium sic meruere rosae; |
| 5 | Sic spoliatricem commendat fastus amicam, |
| 6 | Ianua nec iuvenem semper aperta tenet. |
| 7 | Saepius in libro numeratur Persius uno, |
| 8 | Quam levis in tota Marsus Amazonide. |
| 9 | Tu quoque de nostris releges quemcumque libellis, |
| 10 | Esse puta solum: sic tibi pluris erit. |