| 1 | Claudia, Rufe, meo nubit Peregrina Pudenti: |
| 2 | Macte esto taedis, o Hymenaee, tuis. |
| 3 | Tam bene rara suo miscentur cinnama nardo, |
| 4 | Massica Theseis tam bene vina favis; |
| 5 | Nec melius teneris iunguntur vitibus ulmi, |
| 6 | Nec plus lotos aquas, litora myrtus amat. |
| 7 | Candida perpetuo reside, Concordia, lecto, |
| 8 | Tamque pari semper sit Venus aequa iugo: |
| 9 | Diligat illa senem quondam, sed et ipsa marito |
| 10 | Tum quoque, cum fuerit, non videatur anus. |