| 1 | Vir bonus et pauper linguaque et pectore verus, |
| 2 | Quid tibi vis, urbem qui, Fabiane, petis? |
| 3 | Qui nec leno potes nec comissator haberi, |
| 4 | Nec pavidos tristi voce citare reos, |
| 5 | Nec potes uxorem cari corrumpere amici, |
| 6 | Nec potes algentes arrigere ad vetulas, |
| 7 | Vendere nec vanos circa Palatia fumos, |
| 8 | Plaudere nec Cano, plaudere nec Glaphyro: |
| 9 | Unde miser vives? 'Homo certus, fidus amicus - '. |
| 10 | Hoc nihil est: numquam sic Philomelus eris. |