| 1 | Quintiliane, vagae moderator summe iuventae, |
| 2 | Gloria Romanae, Quintiliane, togae, |
| 3 | Vivere quod propero pauper nec inutilis annis, |
| 4 | Da veniam: properat vivere nemo satis. |
| 5 | Differat hoc, patrios optat qui vincere census |
| 6 | Atriaque inmodicis artat imaginibus. |
| 7 | Me focus et nigros non indignantia fumos |
| 8 | Tecta iuvant et fons vivos et herba rudis. |
| 9 | Sit mihi verna satur, sit non doctissima coniunx, |
| 10 | Sit nox cum somno, sit sine lite dies. |