| 1 | Quod nec carmine glorior supino |
| 2 | Nec retro lego Sotaden cinaedum, |
| 3 | Nusquam Graecula quod recantat echo |
| 4 | Nec dictat mihi luculentus Attis |
| 5 | Mollem debilitate galliambon: |
| 6 | Non sum, Classice, tam malus poeta. |
| 7 | Quid si per gracilis vias petauri |
| 8 | Invitum iubeas subire Ladan? |
| 9 | Turpe est difficiles habere nugas |
| 10 | Et stultus labor est ineptiarum. |
| 11 | Scribat carmina circulis Palaemon, |
| 12 | Me raris iuvat auribus placere. |