| 1 | Florida per varios ut pingitur Hybla colores, |
| 2 | Cum breve Sicaniae ver populantur apes, |
| 3 | Sic tua subpositis conlucent prela lacernis, |
| 4 | Sic micat innumeris arcula synthesibus, |
| 5 | Atque unam vestire tribum tua candida possunt, |
| 6 | Apula non uno quae grege terra tulit. |
| 7 | Tu spectas hiemem succincti lentus amici |
| 8 | - Pro scelus! - et lateris frigora trita times. |
| 9 | Quantum erat, infelix, pannis fraudare duobus - |
| 10 | Quid metuis? - non te, Naevole, sed tineas? |