| 1 | Rufe, vides illum subsellia prima terentem, |
| 2 | Cuius et hinc lucet sardonychata manus |
| 3 | Quaeque Tyron totiens epotavere lacernae |
| 4 | Et toga non tactas vincere iussa nives, |
| 5 | Cuius olet toto pinguis coma Marcellano |
| 6 | Et splendent volso bracchia trita pilo, |
| 7 | Non hesterna sedet lunata lingula planta, |
| 8 | Coccina non laesum pingit aluta pedem, |
| 9 | Et numerosa linunt stellantem splenia frontem. |
| 10 | Ignoras quid sit? splenia tolle, leges. |