Martialis, 1, XV.
| 1 | O mihi post nullos, Iuli, memorande sodales, |
| 2 | Si quid longa fides canaque iura valent, |
| 3 | Bis iam paene tibi consul tricensimus instat, |
| 4 | Et numerat paucos vix tua vita dies. |
| 5 | Non bene distuleris videas quae posse negari, |
| 6 | Et solum hoc ducas, quod fuit, esse tuum. |
| 7 | Expectant curaeque catenatique labores, |
| 8 | Gaudia non remanent, sed fugitiva volant. |
| 9 | Haec utraque manu conplexuque adsere toto: |
| 10 | Saepe fluunt imo sic quoque lapsa sinu. |
| 11 | Non est, crede mihi, sapientis dicere 'Vivam': |
| 12 | Sera nimis vita est crastina: vive hodie. |