Livius, Periochae, 074

monumenta.ch > Livius > 91 > 45 > 59 > 61 > 36 > 93 > 24 > 43 > 80 > 78 > 5 > 69 > 49 > 54 > 79 > 94 > 38 > 63 > 74
Livius, Periochae, LXXIII <<< >>> LXXV

Livius, Periochae, LXXIV

1 Cn. Pompeius Picentes proelio fudit et Asculum obsedit. Propter quam victoriam Romae praetextae et alia magistratuum insignia sumpta sunt. C. Marius cum Marsis dubio eventu pugnavit. Libertini tunc primum militare coeperunt.
2 A. Plotius legatus Umbros, L. Porcius praetor Etruscos, cum uterque populus defecisset, proelio vicerunt.
3 Nicomedes in Bithyniae, Ariobarzanes in Cappadociae regnum reducti sunt.
4 Cn. Pompeius cos. Marsos acie vicit. Cum aere alieno pressa esset civitas, A. Sempronius Asellio praetor, quoniam secundum debitores ius dicebat, ab his qui faenerabant in foro occisus est.
5 Praeterea incursiones Thracum in Macedoniam populationesque continet.