Iustinus, Epitoma, 06, 9

monumenta.ch > Isidorus > 15 > 50 > 8 > 3 > 49 > 2 > 3 > 15 > 3 > 3 > 2 > 34 > 62 > 3 > 42 > 34 > 1 > 6 > 3 > 6 > 2 > 2 > 15 > 16 > 18 > 35 > 20 > 9
Iustinus, Epitoma, 6, VIII <<<

Iustinus, Epitoma, 6, Caput IX

1 Huius morte etiam Atheniensium virtus intercidit, 2 siquidem amisso, cui aemulari consueverant, in segnitiam torporemque resoluti, 3 non ut olim in classem et exercitus, sed in dies festos apparatusque ludorum reditus publicos effundunt 4 et cum actoribus nobilissimis poetisque theatra celebrant, frequentius scenam quam castra visentes versificatoresque meliores quam duces laudantes. 5 Tunc vectigal publicum, quo antea milites et remiges alebantur, cum urbano populo dividi coeptum. 6 Quibus rebus effectum est ut, inter vitia Graecorum, sordidum et obscurum antea Macedonum nomen emergeret, 7 et Philippus, obses triennio Thebis habitus, Epaminondae et Pelopidarum virtutibus eruditus, regnum Macedoniae Graeciae et Asiae cervicibus veluti iugum servitutis inponeret.