Iustinus, Epitoma, 02, 8

monumenta.ch > Isidorus > 10 > 13 > 75 > 39 > > 16 > 46 > 18 > 5 > 3 > 66 > 17 > 22 > 50 > 14 > 32 > 94 > 12 > 25 > 56 > 3 > 67 > 10 > 10 > 32 > 24 > 33 > 16 > 28 > 42 > 13 > 28 > 23 > 4 > 32 > 31 > 60 > 33 > 22 > 62 > 2 > 51 > 3 > 33 > 14 > 37 > 41 > 16 > 15 > 26 > 2 > 30 > 3 > 8
Iustinus, Epitoma, 2, VII <<< >>> IX

Iustinus, Epitoma, 2, Caput VIII

1 Interea Megarenses, memores inlati Atheniensibus belli et deserti, ne frustra arma movisse viderentur, matronas Atheniensium in Eleusinis sacris noctu oppressuri naves conscendunt. 2 Qua re cognita, dux Atheniensium Pisistratus iuventutem in insidiis locat, iussis matronis solito clamore ac strepitu etiam in accessu hostium, ne intellectos se sentiant, sacra celebrare ; 3 egressosque navibus Megarenses inopinantes adgressus delevit ac protinus classe captiva intermixtis mulieribus ut speciem captarum matronarum praeberent, Megara contendit. 4 Illi cum et navium formam et petitam praedam cognoscerent, obvii ad portum procedunt quibus caesis, Pisistratus paulum a capienda urbe afuit. 5 Ita Dorienses suis dolis hosti victoriam dedere. 6 Sed Pisistratus, quasi sibi non patriae vicisset tyrannidem per dolum occupat. 7 Quippe, voluntariis verberibus domi adfectus lacerato corpore, in publicum egreditur, 8 advocata contione, vulnera populo ostendit de crudelitate principum, a quibus haec se passum simulabat, queritur; 9 adduntur vocibus lacrimae et invidiosa oratione multitudo credula accenditur : amore plebis invisum se senatui simulat. 10 Obtinet ad custodiam corporis sui satellitum auxilium, per quos occupata tyrannide, per annos XXXIIII regnavit.