Isidorus, Synonyma de lamentatione animae peccatricis, LIBER SECUNDUS., 93.
| 1 | Si praesentia despexeris, sine dubio aeterna invenies; si saeculares res et humanas calcaveris, facile et leviter coelestem gratiam accipies, et cum eo regnabis qui vivis et mortuis dominatur. |
| 2 | Divitiae nunquam sine peccato acquiruntur, divitiae nunquam sine peccato administrantur. |
| 3 | Nullus res terrenas sine peccato administrat. |
| 4 | Valde rarum est ut qui divitias possident ad requiem tendant; qui curis terrenis se implicant, a Dei timore se separant. |
| 5 | Qui in rerum amore defigitur, in Deo nullatenus delectatur. |