Isidorus, Synonyma de lamentatione animae peccatricis, LIBER SECUNDUS., 91.
| 1 | Brevis est huius mundi felicitas, modica est huius saeculi gloria, caduca est et fragilis temporalis potentia. |
| 2 | Dic ubi sunt reges? ubi principes? ubi imperatores? ubi locupletes rerum? ubi potentes saeculi? ubi divites mundi? quasi umbra transierunt, velut somnium evanuerunt. |
| 3 | Quaeruntur, et non sunt; divitiae usque ad periculum ducunt, divitiae usque ad exitium pertrahunt, multi propter opes periclitaverunt. |
| 4 | Multi propter divitias in discrimen venerunt; multis exitiabiles fuerunt divitiae, multis mortem generaverunt opes. |