Isidorus, Synonyma de lamentatione animae peccatricis, LIBER SECUNDUS., 72.
| 1 | In dispositione autem tolle certamen, tolle pertinacem vincendi defensionem, cede cito veritati, non contradicas iustitiae, non contendas evacuare quod rectum est. |
| 2 | Iure, non fraude, contende, non te peritiorem aliis iudices, nec te ad disputationes contrarias praepares, nec ut vincas contra veritatem coneris. |
| 3 | In omni disputatione tene rationem, disputare stude, non superare; plus dilige audire quam dicere, plus auscultare quam loqui. |