Isidorus, Synonyma de lamentatione animae peccatricis, LIBER SECUNDUS., 60.
| 1 | Divinis enim iudiciis eris reus, quamvis sis oculis humanis absconditus. |
| 2 | Deus ubique praesens est, spiritus eius totum implet: maiestas eius omnia penetrat elementa, cuncta suae potentiae attingit praesentia, extra eum locus nullus est. |
| 3 | Cognitioni eius nihil occultum est, omnia secreta vis virtutis eius irrumpit, nulla occulta sibi latere patitur, nullis obicibus, ut penetret impeditur. |
| 4 | Ipse cogitationes novit, ipse cor inspicit; quod intus agitur aut latet ipse videt, quod intus disponitur ipse comprehendit, etiam quod homo in se ignorat ille novit. |