Isidorus, Synonyma de lamentatione animae peccatricis, LIBER SECUNDUS., 46.
| 1 | Ab otioso sermone compesce linguam, ab otioso verbo reprime linguam. |
| 2 | Cave a fabulis ineptissimis, aniles fabulas non loquaris. |
| 3 | Turpia et inania verba non garrias, retice verbum quod non aedificat audientes, sermo otiosus non erit absque iudicio. |
| 4 | Unusquisque rationem redditurus est sermonum suorum ; ante uniuscuiusque faciem sua verba stabunt. |
| 5 | Qui otiosa verba non reprimit, ad noxia cito transit; qui minima spernit, in maximis facile proruit; minor namque culpa maiorem generat; paulatim crescunt vitia, et dum parva non vitamus, in magnis prolabimur; minima igitur vita, et ad maiora non pervenies; parva sperne, et in deterius non incides. |