Isidorus, Synonyma de lamentatione animae peccatricis, LIBER SECUNDUS., 18
| 1 | Saepe familiaritas implicuit multos. |
| 2 | Saepe occasio peccandi voluntatem facit. |
| 3 | Saepe, quos voluntas non potuit, assiduitas superavit. |
| 4 | Otiositati deditum cito luxuria subripit. |
| 5 | Vacantem luxuria cito praeoccupat. |
| 6 | Gravius libido urit quem otiosum invenerit. |
| 7 | Cedit autem libido rebus, cedit operi, cedit industriae, et labori, libidinem quippe carnis saepe labor evincit, corpus enim labore fatigatum minus delectatur flagitio. |