Isidorus, Synonyma de lamentatione animae peccatricis, LIBER SECUNDUS., 3.
| 1 | Serva rectam fidem, tene sinceram fidem, custodi intemeratam fidem, maneat in te recta fides. |
| 2 | Sit in te incorrupta confessionis fides, nulla te insipiens doctrina decipiat, nulla religio perversa corrumpat, nulla pravitas a fidei soliditate avertat. |
| 3 | Nihil temere de Christo loquaris, nihil de Deo pravum, nihil impium sentias, nihil perverse sentiendo in dilectione eius offendas. |
| 4 | Esto in fide iustus, habeto fidem rectam, conversationem sanctam, quam invocas fide, non abneges opere, ab omnibus quae lex vetat abstine, omnia quae Scriptura prohibet cave. |