Isidorus, Synonyma de lamentatione animae peccatricis, LIBER PRIMUS., 28.
| 1 | Malorum pravitas non te occidit, sed erudit; pravorum adversitas non te deiicit, sed extollit; humana tentatio arguit te, non interficit; quantum enim in hoc saeculo frangimur, tantum in perpetuo saeculo solidamur; quantum in praesenti affligimur, tantum in futuro gaudebimus. |
| 2 | Si hic flagellis atterimur, purgati in iudicio inveniemur. |
| 3 | Semper Deus hic vulnerat quos ad salutem perpetuam praeparat. |
| 4 | In fornace probatur aurum, tu, ut sorde careas, tribulationis camino purgaris, ut prior appareas, persecutionis igne conflaris, ut omnium peccatorum sorde purgeris, ad probationem sunt ista omnia quae sustines. |