Isidorus, Synonyma de lamentatione animae peccatricis, LIBER PRIMUS., 8.
| 1 | Crevit avaritia, periit lex cupiditatis amore, iura nihil valent, praemia et dona legibus vires tulerunt. |
| 2 | Ubique pecunia vincit, ubique iudicium venale est; nullus legibus metus, nullus iudicii timor. |
| 3 | Impunita manet male vivendi licentia, nemo peccantibus contradicit, nec scelus ulciscitur quisquam. |
| 4 | Omne crimen inultum manet, iniqui salvi fiunt, innocentes pereunt, boni indigent, improbi abundant, scelerati potentes sunt. |