Isidorus, Sententiae, 2, 28

monumenta.ch > Isidorus > 39 > 38 > XXXV DE RATIONE PVERPERII MATVRI. > 2 > 28
Isidorus, Sententiae, 2, XXVII. De intentione mentis. <<< >>> XXIX. De sermone.

Isidorus, Sententiae, 2, CAPUT XXVIII. De sensibus carnis.

[

CAP. XXVIII. N. 1. In Excusis cogitationes, quod abstuli, et reposui cognationes, ex Ierem. I: Ecce ego convocabo omnes cognationes regnorum Aquilonis. Atque ita constanter legunt Hieronym. et caeteri neoterici interpretes; Septuaginta autem non habent cognationes, sed tantum: Ecce ego convocabo omnia regna ab Aquilone: Ἰδοὺ ἐγὼ συγκαλῶ πάσας τὰς βασιλείας ἀπὸ βοῤῥᾶ. LOAISA.

] Per sensus carnis morbus irrepit mentis. Unde et per prophetam Dominus dicit: Omnes cognationes terrae ab Aquilone venient, et ponet unusquisque solium suum in introitu portarum Ierusalem [Ierem. 1, 15]. Regna Aquilonis vitia sunt, quae sedes suas in portis ponunt, quando per sensus carnis labem animae ingerunt; ideoque in ipsis portis, id est, in ipsis sensibus regnant.

[

2. Greg., l. Moral. XXI, c. 2. LOAISA.

Ibid. Illecebrando devincunt. Forte, illecebrando devinciunt. AREV.

] Neque enim aliunde peccamus, nisi videndo, audiendo, attrectando, gustando, atque tangendo. Unde et alias dicitur: Intravit mors per fenestras nostras. Et alibi: Extranei ingrediebantur per portas eius, et super Ierusalem mittebant sortem. Extraneos quippe immundos esse spiritus, qui tanquam per portas, ita per sensus carnis animam irrepunt, et eam illecebrando devincunt.