| 1 | [ CAP. XXV. N. 1. Antichristus Latine dicitur contrarius Christo, ut auctor est Augustinus in primam canonicam Ioann. tract. 3, et in libello de Antichristo, si modo eius est, et Gregor., lib. XXIX Moral., c. 6. Rebellis Christo vocatur a Tertull., lib. de Praescript. adversus haeret. A Ioann. I, II, mendax dicitur. Quis est, inquit, mendax, nisi qui negat, quoniam Iesus non est Christus? hic est Antichristus. Apoc. XIII Bestia nominatur. Homo peccati, et filius perditionis a Paulo II Thess. II. Haec aliaque multa nomina illi per translationem et allegoriam in divinis litteris tribuuntur. LOAISA. Ibid. De Antichristo notum est opus doctissimi Malvendae, ut alios omittam. AREV. ] Omnis qui secundum Christianae professionis normam aut non vivit, aut aliter docet, Antichristus est. |
| 2 | Plerique autem Antichristi tempora non visuri sunt, et tamen in membris Antichristi inveniendi sunt. |
| 3 | [ 3. Membra Antichristi sunt haeretici et improbi Christiani; qui ore Christum confitentur, factis autem negant, ex August., tract. 3 super primam Epist. Ioann. Quisquis factis, inquit, negat Christum, Antichristus est. Quotquot enim habet Ecclesia periuros, fraudatores, adulatores, ebriosos, feneratores, aliosque id genus sceleratos homines, antichristos, hoc est, adversarios Christi esse, idem recte asserit. Quod ipsum etiam de haereticis censet, ex illo eiusdem loci: Antichristus est qui negat Patrem et Filium. Omnis spiritus, qui solvit Iesum, ex Deo non est, et hic est Antichristus. LOAISA. Ibid. Locus Pauli est II Thess. II. Nam mysterium iam operatur iniquitatis. In quem locum divus Thomas Aquinas sic ait: Sicut omnia bona sanctorum ante Christum fuerunt figura Christi, sic in omni persecutione Ecclesiae tyranni fuerunt, quasi figura Antichristi. Graeci hunc Pauli locum de Nerone dictum accipiunt, in qua sententia etiam divus Ambros. est in hunc locum. LOAISA. ] Antequam veniat Antichristus, multa eius membra praecesserunt, et pravae actionis merito caput proprium praevenerunt, secundum Apostoli sententiam, qui iam iniquitatis mysterium operari illum affirmat, etiam antequam reveletur [II Thess. |
| 4 | Magnitudo signorum faciet sub Antichristo ut electi, si fieri potest, in errorem mittantur [Matth. |
| 5 | [ 5. Num vera futura sint miracula ac prodigia Antichristi, vide Augustin., lib. XX de Civit. Dei, cap. 19. LOAISA. Ibid. Durius bellum. Quam atrox Antichristi bellum futurum sit patet ex illo Isai. XIV: Hic homo, qui concitat terram, commovet reges, qui ponit orbem terrae totum desertum. Sic enim legit Cyprianus, interpretaturque de Antichristo, lib. III Testimoniorum ad Quirinum. Vulgata Editio ita habet: Nunquid iste est vir qui turbavit terram, qui concussit regna, qui posuit orbem desertum, et urbes eius destruxit? LOAISA. Ibid. Scrupulus, quod tamen. Melius videretur scrupulus quem tamen. AREV. ] Tam mira facturus est prodigia et signa, dum venerit Antichristus, ut etiam electis quidam cordis gignatur scrupulus, quod tamen cito exsuperet in illis ratio, per quam scient in deceptionem reproborum et electorum probationem eadem fieri signa. In quo tempore per patientiam gloriosi erunt sancti, non per miracula, sicut martyres fuerunt priores. Illi enim et persecutores sustinebunt, et facientes prodigia. Proinde et durius bellum sustinebunt, quia non solum contra persequentes, sed etiam contra miraculis coruscantes dimicaturi sunt. |
| 6 | Gravius sub Antichristi temporibus contra Ecclesiam desaeviet Synagoga, quam in ipso adventu Salvatoris Christianos est persecuta. |
| 7 | [ 7. Crudelior erit, etc. Al., crudelior erit tamen sub Antichristi, etc., ligatus facere potuit, quanta, etc. AREV. ] Dum in martyres diabolus iam exercuerit magnam crudelitatem etiam ligatus, crudelior erit tamen sub Antichristi temporibus, quando etiam erit solvendus. Nam si tanta ligatus, quanta solutus faciet? |
| 8 | Quanto propinquius finem mundi diabolus videt, tanto crudelius persecutiones exercet, ut quia se continuo damnandum conspicit, socios sibi multiplicet, cum quibus gehennae ignibus addicatur. |
| 9 | [ 9. Ita in Mss. et in Editione veteri. De tempore adventus Antichristi vide piam ac prudentem sententiam August., lib. XVIII de Civit. Dei, cap. 93, et Greg., XXXIV Moral., cap. 10. LOAISA. Ibid. Al., quanto brevius. Codex meus, videt se regnare diabolus. AREV. ] Quanto breve tempus videt sibi restare diabolus, ut damnetur, tanto in magna persecutionis ira movetur, divina iustitia permittente, ut glorificentur electi, sordidentur iniqui, et ut diabolo durior crescat damnationis sententia. |