Isidorus, Historia de regibus, HISTORIA., 19. Aera CDXLVIII
| 1 | Anno imperii Honorii XVII, et primo Theodosii Minoris, Alarico post captam Urbem defuncto, Athaulfus a Gothis Italiae regno praeficitur annis VI. Iste, quinto regni anno de Italia recedens, Gallias adiit, Placidiam Theodosii imperatoris filiam, quam Romae Gothi ceperant, coniugem sibi assumpsit. |
| 2 | In qua prophetia Danielis a quibusdam creditur fuisse completa, qui ait filiam regis Austri coniungendam regi Aquilonis, nulla tamen de germine eius sobole subsistente. |
| 3 | Sicut, et idem in sequentibus propheta subiungit dicens: Nec stabit semen eius. |
| 4 | Nullus enim de utero illius exstitit genitus, qui patris in regno succederet. |
| 5 | Athaulfus autem dum, relictis Galliis, Hispanias peteret, a quodam suorum apud Barcinonam inter familiares fabulas iugulatur. |