Isidorus, Historia de regibus, HISTORIA., 8.
| 1 | Tunc Gulfilas eorum Gothorum episcopus Gothicas litteras condidit, et scripturas Novi ac Veteris Testamenti in eamdem linguam convertit. |
| 2 | Gothi autem, statim ut litteras et legem habere coeperunt, instruxerunt sibi dogmatis sui Ecclesias, talia iuxta eumdem Arium de ipsa divinitate documenta tenentes, ut crederent Filium Patri maiestate esse minorem, et aeternitate posteriorem. |
| 3 | Spiritum autem sanctum, nec Deum esse, neque substantiam Patris existere, sed per Filium creatum esse, utriusque ministerio deditum, et amborum obsequio subditum. |
| 4 | Aliam quoque Patris sicut personam, sic et naturam asserentes; aliam Filii, aliam denique Spiritus sancti, ut iam non (secundum sanctae Scripturae traditionem) unus Deus et Dominus coleretur, sed, iuxta idololatriae superstitionem, tres dii venerarentur. |
| 5 | Cuius blasphemiae malum per decessum temporum, regumque successum, annis CCXIII tenuerunt. |
| 6 | Qui tandem reminiscentes salutis suae, renuntiaverunt inolitae perfidiae, et per Christi gratiam ad unitatem fidei catholicae pervenerunt. |