Isidorus, Historia de regibus, HISTORIA., 3. Anno ante aeram conditam XII
| 1 | Dum pro arripiendo reipublicae imperio, Cn. Pompeius et C. Iulius Caesar arma civilia commovissent, Gothi, ad praebendum Pompeio auxilium, in Thessaliam adversus Caesarem pugnaturi venerunt. |
| 2 | Ubi dum in Pompeii exercitu Aethiopes, Indi, Persae, Medi, Graeci, Armeni, Scythae, ac reliquae Orientis gentes evocatae adversus Iulium dimicassent, isti prae caeteris Caesari fortius restiterunt. |
| 3 | Quorum Caesar copia et virtute turbatus fertur fugam meditatus esse, nisi nox praelio finem dedisset. |
| 4 | Tunc Caesar ait nec Pompeium scire vincere, nec Caesarem posse vinci. |
| 5 | Nam si Pompeius vincere nosset, hodie cum tam asperis viris Caesarem superasset. |