Isidorus, Etymologiae, Liber 01, 2

monumenta.ch > Plinius Minor > 1 > 6 > 5 > 1 > 15 > 3 > 2
Isidorus, Etymologiae, Liber 1, I De disciplina et arte <<< >>> III De litteris communibus

Isidorus, Etymologiae, 1, II De septem liberalibus disciplinis

1 Disciplinae liberalium artium septem sunt. Prima grammatica, id est loquendi peritia. Secunda rhetorica, quae propter nitorem et copiam eloquentiae suae maxime in civilibus quaestionibus necessaria existimatur. Tertia dialectica cognomento logica, quae disputationibus subtilissimis vera secernit a falsis. 2 Quarta arithmetica, quae continet numerorum causas et divisiones. Quinta musica, quae in carminibus cantibusque consistit. 3 Sexta geometrica, quae mensuras terrae dimensionesque conplectitur. Septima astronomia, quae continet legem astrorum.