Isidorus, Epistolae, 4, 5.
| 1 | Ezechiel enim propheta sub typo praevaricatricis Ierusalem ostendit post poenitentiae satisfactionem pristinum posse restaurari honorem. |
| 2 | Confundere (inquit), o Iuda, et porta ignominiam tuam. |
| 3 | Et post paululum: Et tu, inquit, et filiae tuae revertimini ad antiquitatem vestram (Ezech. XVI, 52). |
| 4 | Quod dixit, confundere, ostendit post confusionem, id est, peccati opus, debere quemque erubescere, et pro admissis sceleribus verecundam frontem humi prostratam demergere, pro eo quod dignum confusionis perpetraverit opus. |
| 5 | 6. Deinde praecipit ut portet ignominiam, id est, dehonorationem nominis, sive dignitatis, et revertatur ad antiquitatem suam. |
| 6 | Ergo dum quisque post opera confusionis suae confunditur, atque ignominiam depositionis suae cum humilitate portaverit, revocari secundum prophetam ad priorem statum poterit. |
| 7 | Item Ioannes evangelista angelo Ephesi Ecclesiae inter caetera simile quiddam scribit: Memor esto unde cecideris, et age poenitentiam, et prima opera tua fac, alioquin veniam tibi, et movebo candelabrum tuum de loco suo (Apoc. II, 5). |