| 78 | [ 78. A puritate. Non., Pueritia, id est puritas. Varro Rerum divinar. lib. I, Quae pueritia est infrequens polluta. Ibid. Quia nondum lanug. Fest., Puer, impubes tantum dicitur. ] Inter infantem et puerum quidam ex sapientibus distinxerunt. Infans, inquiunt, dicitur, qui nondum fari potest. Puer autem a puritate vocatus quasi purus, sive quia nondum lanuginem floremque genarum inducunt. |
| 79 | [ 79. Quasi pulla. Pullum est aetatis novellae, ait Non. Ibid. Puerilitate, ita Codex Hisp. Varro de Liber. educand., Velim, me Hercle, ipse usu magno puerilitatis formulam audire. Al. puerili aetate. Ibid. Notae Wicelii in Grialii Editione perturbatae sunt, et extra ordinem suum collocatae. Notas, A puritate, etc., et quia nondum lanugo, facile fuit ad suum locum revocare. Notae puerilitate; ita Codex, etc., et al., puerili aetate, videntur positae pro verbis pro aetate puerili. AREV. ] Puella autem a parvitate vocata, quasi pulla. Unde pupillos et pupillas non pro conditione, sed pro aetate puerili vocamus. Puer olim et masculus et femina appellabatur, sicut infans. Hinc consuetudo communis puerperam vocat. Proprie autem puerperas dici quae primum enixae sunt pueros, eo quod puellae admodum pariant. |
| 80 | Egressi pueritiam masculi, puberes appellantur, quia iam gignendi potestatem sumunt; feminae vero virgines vel viragines dicuntur. Dicta autem virago, vel quod a viro sumpta sit, vel quod sit masculini vigoris. Simul pubertatem egressi, adolescentes appellantur. Adolescentes autem dicti ab adolescendo atque crescendo. Unde et quidam, de agricultura loquens, maturescentem fructum adolescentem vocavit. |
| 81 | [ 81. In Editione Grialii mendum clarum erat iuventus pro iuvencus; in aliis desunt haec verba, ut in bobus, etc. AREV. ] Post adolescentiam quoque iuvenes fiunt. Iuvenes autem dicti, quod iuvare posse incipiunt, ut bobus iuvencus dicitur, cum a vitulo discedit. |
| 82 | [ 82. Quasi mollier. Non male alii, quasi mollior. AREV. ] Iam vero mediae aetatis proprie dicuntur vir et mulier. Vir itaque nuncupatus, ut ait Lactantius, quia maior in eo vis sit quam in feminis, et hinc virtus nomen accipit. Item mulier a mollitie dicta, immutata et detracta littera, quasi mollier. |
| 83 | Sed ideo viris plus roboris datum est, ut facilius ad patientiam coniugalem feminae cogerentur. Mulier autem non pro corruptela integritatis, sed pro sola maturitate aetatis mulier nominatur; sicut et vir pro sola virilitate, etiamsi ab opere femineae admixtionis habeatur immunis. |
| 84 | Extremae iam aetatis, senes et anus vocantur. Senes autem quidam dictos putant, eo quod se nesciunt, et per nimiam aetatem delirent atque desipiant. Unde et Plato: In pueris crescit sensus, in iuvenibus viget, in senibus minuitur. Anus autem ex multis annis dicta est, quasi annosa. |