| 324 | Inter Libertatem et liberalitatem. Libertas conditionis est, liberalitas vero beneficentiae et largitatis, ut nudum vestire, captivos redimere, pauperi victum [Al., add. tribuere vel] administrare. |
| 325 | Inter Laudabilem et laudandum. Laudabilis est qui laudari potest, laudandus qui laudari debet. |
| 326 | [ 326. Vid. Non., dict. Luxum, et dict. Luxuria, ipse lib. Etymolog. X, littera L. ---Fest., dictione Prodegeris, et dict. Prodiguae hostiae. ] Inter Luxuriosum et prodigum. Luxuriosus, quasi solutus in voluptates, unde membra loco mota luxa dicuntur; prodigus autem sumptuosus, qui omnia porro agit, et quasi proiicit. |
| 327 | Inter Lascivum et petulantem. Lascivus luxu, petulans temeritate. Petulantia autem libido dicitur, ab eo quod petit male alienum pudorem. |
| 328 | Inter Litigiosum et litigatorem. Litigiosus est de quo litigatur, quasi ager; litigator qui litigat. |
| 329 | [ 329. In textu et in nota pro varia scriptura est exsultationis. Utrolibet loco videtur reponendum exsultatione. AREV. ] Inter Laetitiam et exsultationem. Laetitia est mentis gaudium, exsultatio vero verborum atque membrorum. Rursus exsultatio a iubilatione [Al., ad iubilationem] distinguitur. Ubi enim verba sufficiunt laetitiae, et lingua idonea est mentis gaudium explicare, exsultatio est. Ubi vero non potest quisque conceptum gaudium verbis annuntiare [Al., nuntiare], sed ipsam animi effusi [Al., diffusi] laetitiam in vocem quamdam exsultationis erumpit, iubilatio est. |
| 330 | Inter Lethum et mortem quidam tentaverunt facere discretionem, dicentes: Lethum per se venit, mors vero infertur. |
| 331 | [ 331. Pertinacia. Non., dict. Pervicacia. Ibid. In nota Pantini erat forte libidinem, quod mutavi ad eius mentem, ut opinor, in f. livedinem. Barthius e suo Ms. corrupto emendabat immundicinam; sed melius est immunditias. AREV. ] Inter Libidinem et lividinem [Forte, libidinem]. Libido per b cupiditas est animi; livido [Forte, livedo] per v livor est corporis. Sunt autem multae variaeque libidines, sicut libido ulciscendi, quae ira vocatur; sicut libido habendi pecuniam, quae avaritia nominatur; sicut libido quomodocunque vincendi, quae pertinacia dicitur; sicut libido gloriandi, quae iactantia nuncupatur. Et cum sint multarum libidines rerum, neque cuius rei libido sit adiicitur, non solet animo occurrere, nisi illa tantum qua obscenae partes corporis ad flagitiorum immunditias excitantur. Sed merito ista inter caetera hoc sibi nomen proprie obtinuit, quia in carne corruptibili plus caeteris saevit. Dicta autem libido, eo quod libeat alienum pudorem, sive quamcunque rem appetere. |
| 332 | [ 332. Al., Eius ipsa virtus enitens. F. Eius in quo virtus enitet. ] Inter Laudem et laudationem. Laus est eius qui laudatur; Laudatio vero eius qui laudat. Item laus est in qua virtus enitet; laudatio, ipsa laudantis oratio [Al., laudatio orationum]. Laus et laetitia [Al., laudem laetitiam,] sine celebratione vocis in animi admiratione consistit: laudatio vero rei cuiusque praedicatio est, adminiculo orationis ornata. |
| 333 | [ 333. Ex Agraetio. ] Inter Largitatem et largitionem. Largitas humanitatis est, largitio ambitionis. |
| 334 | [ 334. Ex Agraetio. ] Inter Laetari et gratulari. Laetamur de nostris bonis, gratulamur de amicorum [Agraet., alienis]. |
| 335 | [ 335. Ex Serv., ad ill. I Georg.: Primi lege littoris oram; et ill. III Aen.: Littoraque Epiri legimus; et II Aen. Pars caetera pontum pone legit. ] Inter Legere et lectitare. Legere ad tempus refertur, lectitare ad frequentiam. Interdum et legere nauticum verbum est, quia et navis dicitur legere quidquid transit. |
| 336 | [ 336. Ex Agraetio. ---Non est av. nisi quod incurvum est, Agraet. ---Vanissime. Ex Serv., ad ill. II Eclog.: Calamo trivisse labellum. ] Inter Labium et labrum. Labium superius dicimus, labrum inferius. Rostrum, non nisi avium, quod incurvum est. Vanissime autem quidam nititur [Al., tentant] facere discretionem, ut virorum labra, mulierum labia dicantur [Al., dicant]. |
| 337 | [ 337. Ex Serv., ad ill. I Georg.: Lactentia turgent. Ibid. In Barthii Codice, lactens, qui ducit; quod verbum ducit elegans est, ut ait Barthius, et lactenti maxime congruum. AREV. ] Inter Lactantem et lactentem, quod lactans est quae lac praebet, lactens cui praebetur. |
| 338 | [ 338. Ex Serv., ad citata verba ab Isidoro, quae sunt I et II Aen. ---Serv., ad locum citatum, qui est II Aen. ] Inter Leges et iura. Ius dicitur, lex scribitur. Unde et Virgilius: Iura dabat legesque viris. Item leges humanae, iura divina sunt. Ideoque et iuramentum dicitur id est, sacramentum in Deo [Al., Domino]. Hinc et Virgilius: Fas mihi Graiorum sacrata resolvere iura. |
| 339 | [ 339. Sic fere ipse, lib. II Etymolog., cap. 10, et lib. IV, cap. 3. ] Inter Leges et mores. Lex est scriptis edita, mos autem lex quaedam vivendi, nullo vinculo astricta [Al., astrictus], sive lex non scripta, sed tantum cum usu retenta. |
| 340 | [ 340. Sic ipse Etymolog. lib. X, littera L. Varro, quod circa latera ferrum habeat. Fest., quod a latere adoriatur, aut ἀπὸ λατρείας. ---Serv., ad ill. III Georg.: Nocturnum stabulis furem. ] Inter Latronem et furem. Qui alienum involat [Al., aliquid subtrahit], fur est; qui furatur et occidit, latro est. Proprie autem latro a latitando insidiis [Forte, in insidiis] dictus; fur autem a furvo vocatus, id est, nigro; nam noctis utitur tempore. Pulchre autem Plautus cuidam [Al., de quodam] qui furabatur ait (Plaut. Aulularia): Tu trium litterarum homo, id est, fur. |
| 341 | [ 341. Vid. Fest., dict. Religiosus, et Macrob. lib. III Saturn., cap. 3. ---Soli, etc. F. Solisancti, duae sequentes dictiones forte glossema. ] Inter Locum religiosum, et sacrum, et sanctum, quod sacrum vocamus, quod ad deos superos pertinet; religiosum, quod ad deos inferos; sanctum vero, quod aliqua sanctitate sanctum est, ut sunt tauri apud Homerum (Ὀδυσσ. μ) soli sancti, sacri, sacrosancti. |
| 342 | [ 342. Forte lotorem aut lavatorem. Ibid. Pantinus in not. coniicit lotorem, quod exstat etiam in textu. Fortasse in textu vel in nota legendum lutorem. Vox lutor et lotor apud quaedam vetera monumenta reperitur: de voce lavator minus id liquet. AREV. ] Inter Labat et lavat. Labat nutat, lavat lotorem esse. |
| 343 | Inter Laetum et lethum. Laetum gaudentem, lethum mors dicitur. |
| 344 | Inter Labium et labrum. Labium oris; labrum vasis, a rostro, quod incurvum est. |
| 345 | [ 345. Etiam Fest. distinguit dict. Lympha. ] Inter Lympham et nympham. Lympham aquam, nympham deam. |
| 346 | Inter Litem et rixam. Lis inter duos committitur, et mota finitur; Rixa inter multos et iurgio [Al., iniuria] constat. |
| 347 | Inter Ligat et legat. Ligat quis vinculo, legat testamento. |
| 348 | [ 348. Ex Agraetio, qui forte ex Isidoro supplendus. ] Inter Limen et limitem. Limen aedium est, limes regionum vel finium. |
| 349 | [ 349. Eadem fere lib. Etymolog. VI, cap. 16. Ibid. Melius est mola quam mole: nam vere immolo a mola deducitur. AREV. ] Inter Libat et immolat. Veteres immolare dicebant, quando victimas in mole [Al., mola] altaris ponentes ignem sacrificiis [Al., sacrificium] subiiciebant. Libare autem quando pateras mero plenas aris fundebant. Nam libare proprie fundere est. Unde et Liber vocatur qui [Al., quia] vini usum in Graecia ostendisse fertur. Nos ergo iuxta verborum distinctionem immolamus panem, libamus calicem. |