Isidorus, De ordine creaturarum, CAPUT XII. De natura hominum post peccatum.
| 1 | 1. Sed huius interim orbis habitationi post originale peccatum homines destinati, non totum quod in conditione sua habuerant naturale bonum perdiderunt; sed vitiatum primitus delicto parentis, pravis insuper moribus corruperunt, et ita fit ut sicut cum labore terrae maledictae fructus percipiunt, sic et bonum naturale quod in se habent non absque laboriosa cura custodire possunt. |
| 2 | 2. Et quomodo in serpente, et muliere, et viro consentiente, in protoplasti transgressione tripliciter ceciderant, pari modo tribus vulneribus afflicti omnes eiusdem filii, id est, dolore, senectute, morte deficiunt, et omne bonum, quod in se insitum naturaliter a Conditore susceperant, studioso labore ex parte aliqua inventum magna animi vigilantia vix conservant; et quodcunque bonum per studium Dei munere quaesitum inveniunt, praeter iniquam mammonam haeredibus non relinquunt, et omnes artes, quas sigillatim in vita capiunt, in huius vitae defectu pariter, dum spiritus funditur, amittunt. |
| 3 | 3. Parique infirmitatis conditione pauperes et reges, stulti et sapientes vexantur. |
| 4 | Nam similiter omnes somno indigent, et cibo refici, et vestibus indui necesse habent. |
| 5 | Passionibus vitiorum carnalium aut gravantur, aut corrumpuntur; motibus animi, id est, ira et amore, concupiscentia et timore angustiantur. |
| 6 | Dolore, et senectute, et morte deficiunt. |
| 7 | De praeteritis cito exuuntur; de praesentibus modice utuntur; de futuris incerta omnia praestolantur. |
| 8 | 4. Eodem modo auditu, visu, tactu, gustu, odoratu sentiunt et vivunt. |
| 9 | Eodem etiam nexu originalis peccati astringuntur; eodem Redemptoris munere ditati undis baptismatis et Spiritu sancto abluuntur; sed et his hominibus, aut redemptionis fidem, aut opera fidei negligentibus, pariter cum transgressoribus angelis et diabolo suo principe poena debetur aeterna; servantibus vero, sive per Scripturae documenta, sive per naturae bonum munimina, primae conditionis iura, Redemptoris munere vita praeparata est futura. |