Isidorus, De fide Catholica, 2, 27, 1

1	Et quia panis et calicis sacramentum Deo placitum esset in holocausto, Scripturarum testimoniis non tacetur.
2	Huius enim sacrificii praefiguratio in sacerdotio Melchisedech antea fuit expressa.
3	Iste enim sacerdos Dei excelsi, cum benediceret Abrahae, ob mysterium futuri holocausti panem et vinum in sacrificio Domino obtulit.
4	Hoc enim ille primum in typo Filii Dei expressit: ad quem Psalmista ex persona Patris sic dicit: Ante luciferum genui te.
5	Tu es sacerdos in aeternum secundum ordinem Melchisedech (Psal. CIX, 3).
6	Hoc est iuxta ritum huiusmodi sacrificii, quod et in passione sua perficiens Christus implevit, quodque etiam apostolis in commemorationem suam fieri iussit.