| 1 | De hoc fonte et Zacharias, In die, inquit, illa erit fons patens domui David, et habitantibus Ierusalem in ablutionem peccatorum, et menstruatae (Zach. XIII, 1). |
| 2 | Dic, quaeso, quis est iste fons patens, nisi in quo omnes renascimur, per quem peccatorum purificantur delicta, et sordes menstruatae, hoc est, immundae animae salutari lavacro abluuntur? De cuius aquis et alibi idem propheta testatur: « Et erit, inquit, in die illa, exibunt aquae vivae de Ierusalem, medium earum ad mare orientale, et medium earum ad mare novissimum. |
| 3 | In die illa erit Dominus unus, et nomen eius unum, et revertetur omnis terra usque ad desertum (Zach. XIV, 8). |