Isidorus, De fide Catholica, 2, 19, 1

1	Hactenus ritus Iudaicos et celebrationes divinis testimoniis confutavimus; dehinc sacramenta nostrae fidei perstringamus, manifestantes primum quia non solum propter Iudaeos Testamentum legis datum est, sed etiam propter omnes gentes.
2	Haec enim propheta David testatur, dicens: Annuntiabitur Domino generatio ventura, et annuntiabunt coeli iustitias eius populo qui nascetur, quem fecit Dominus (Psal. XXI, 32).
3	Et iterum ipse: Donec annuntient brachium tuum generationi omni quae ventura est, potentiam tuam, et iustitiam tuam Deus (Psal. LXX, 18).