Isidorus, De fide Catholica, 2, 8, 1.
| 1 | Ecce ostensum est Iudaeos pro scelere, quo in Christo peccaverunt, abiectos, dispersosque fuisse. |
| 2 | Sed quia, proiectis illis, gentes in eorum sedibus per fidem erant successurae, non siluerunt et haec prophetae. |
| 3 | Isaias enim sic dicit: « Educ foras populum caecum, et oculos habentem, surdum, et aures ei sunt. |
| 4 | Omnes gentes congregatae sunt simul, et collectae sunt tribus. |
| 5 | Quis in vobis annuntiet istud? et quae prima sunt, audire nos faciet » (Isai. XLIII, 8)? Ecce foras educitur Israel, habens oculos et aures, ad terrenas promissiones; et colligitur in unum diversitas gentium, ut, ubi illi vocati sunt, isti ingrediantur, et ad istos pertineat haereditas quae illis fuerat repromissa. |