| 1 | Et quia ob incredulitatem Iudaeorum Christus Iudaeam desereret, transiretque ad gentes, Ieremias propheta praedixerat, dicens: « Tibi peccavimus, exspectatio Israel, Salvator eius. |
| 2 | Quare sicut colonus futurus es in terra, et quasi viator declinans ad manendum? quare futurus es quasi vir vagus et qui non potest salvari » (Ierem. XIV, 8)? Quid enim in hac sententia intelligitur, nisi quia videbat propheta in spiritu quod veniens Christus relicturus esset Iudaeam, et iret per fidem in gentibus? Idcirco dicebat: Quare sicut colonus futurus es in terra, et quasi viator declinans ad manendum? Hoc est, venisti in terram, cito recessurus a Iudaeis. |