| 1 | Hic secundus Christi praedicatur adventus, ut ea virtute consurgat ad iudicium, ad separationem bonorum atque malorum, qua virtute surrexit in generationibus saeculorum. |
| 2 | Hoc est in principio, quando percussit superbum, id est, diabolum, separando eum a bonorum consortio angelorum. |
| 3 | De quo Christi iudicio et Michaeas propheta sic loquitur, dicens: Audite, colles, iudicium Domini, et fortia fundamenta terrae, quia iudicium Domini cum populo suo et cum Israel diiudicabitur, dicens: Popule meus, quid feci tibi, aut quid molestus fui tibi? responde mihi (Mich. VI, 1). |