Isidorus, De fide Catholica, 1, 9, 11

1	Adhuc idem Isaias de Christo, quia ex semine David nasciturus esset secundum carnem, sic in consequentibus dicit: In die illa radix Iesse, qui stat in signum populorum, ipsum gentes deprecabuntur, et erit sepulcrum eius gloriosum (Isai. XI, 10).
2	In signum populorum stat radix Iesse, quando Christus signaculum crucis exprimit in frontibus eorum.
3	Ipsum gentes deprecabuntur, quod iam hoc totum cernitur fuisse completum.
4	Sepulcrum autem eius in tantum est gloriosum, ut excepto quod redempti per mortem eius gloriam ei exhibemus, etiam locus ipse coruscans miraculis, gloriae suae causa ad se omnem contrahat mundum.