| 1 | Chrismatis unguentum Moyses primum in Exodo, iubente Domino, et composuit, et confecit, quo primi Aaron et filii eius in testimonium sacerdotii et sanctitatis peruncti sunt (Exod. XXX). |
| 2 | Deinde quoque et reges eodem chrismate sacrabantur, unde et christi nuncupabantur, sicut scriptum est: Nolite tangere christos meos (Psal. CIV, 15), eratque eo tempore tantum in regibus et sacerdotibus mystica unctio, qua Christus figurabatur; unde et ipsum nomen a chrismate dicitur. |