Isidorus, De ecclesiasticis officiis, 2, 20, 10

1	Nam et ipsae dotales tabulae indicant quod causa procreandorum liberorum ducitur uxor.
2	Quando ergo quisque luxuriose amplius vivit quam necessitas procreandorum liberorum cogit, iam peccatum est.
3	Unde necesse est ut quotidianis eleemosynis, ac precibus intercedant qui tori coniugalis pudicitiam frequentius per incontinentiam maculant.
4	Nuptialia autem bona tria sunt: proles, fides et sacramentum.
5	In fide attenditur, ne praeter vinculum coniugale cum altera vel altero concumbatur; in prole, ut amanter suscipiatur, pudice nutriatur; in sacramento, ut coniugium non separetur, neque causa prolis alteri coniungantur.